ગૂગલને આપણે સૌ ઓળખીએ છીએ. એ સર્ચ એન્જિન છે અને આપણને જોઈતી માહિતી ઈન્ટરનેટ પરથી શોધીને ગણતરીની સેકન્ડમા આપે છે. હવે ટેકનોલોજી જગતના નિષ્ણાતો એ વાતે ચર્ચાએ ચડ્યા છે કે ChatGPT નામની નવી સિસ્ટમ આવી ગઈ છે જે ગૂગલને રેલો લાવી દેશે.
તો પછી ChatGPT છે શું અને શા માટે ગૂગલે તેનાથી ખતરો છે એ સમજવા પ્રયાસ કરીએ. ChatGPTએ હકીકતે ચેટબોટ છે. ચેટબોટથી આપણે સૌ વાકેફ છીએ. ચેટબોટ એ એક પ્રકારનો રોબોટ છે, જેનું નામ કમ્પ્યુટરમાં પહેલેથી ફીટ થયેલા જવાબ આપવાનું છે. આપણે એમેઝોનમાંથી કંઈ મંગાવીએ અને પરત આપવાનુ થાય તો ચેટિંગ માટે બોક્સ ખુલે. મોટે ભાગે શરુઆતમાં તો બધા જવાબો ચેટબોટ જ આપે. પછી પ્રશ્ન વધારે અઘરો હોય તો સામેની ટીમમાંથી કોઈ આવીને આપણી વાત સાંભળે.
દુનિયાની અનેક કંપનીઓ આ રીતે ચેટબોટનો ઉપયોગ કરે છે. એમાં ChatGPT ચેટબોટે હાહાકાર મચાવી દીધો છે. કેમ કે એ માત્ર ગોખેલા નહીં વિચારેલા જવાબો આપે છે. એટલે જ તો મેડિકલ, વકીલ, મેનેજમેન્ટ વગેરેની પરીક્ષા ChatGPTએ પાસ કરી લીધી છે. તેને પ્રશ્ન પૂછવામાં આવે કે કેલિફોર્નિયા રાજ્યના બદામના પાક વિશે નિબંધ લખો તો કોઈ જાણકારે લખ્યો હોય એવો નિબંધ લખી આપે છે.
OpenAI નામની કંપનીએ આ ChatGPTનું સર્જન કર્યું છે. ઓપનએઆઈના નામમાં એઆઈ છે, જેનો અર્થ થાય છે કૃત્રિમ બુદ્ધિ અથવા તો અક્કલ હોય એવુ મશીન. મશીનને જો અક્કલ આવી જાય તો પછી એ મનુષ્ય સાથે સ્પર્ધા કરે એને કેટલી વાર? હકીકત એવી છે કે ચેટ-જીપીટીના કિસ્સામાં બધાને એવુ લાગે છે કે એ અક્કલવાળુ મનુષ્ય થઈ ગયુ છે. દુનિયાની અગ્રણી ટેકનોલોજી કંપનીઓ વર્ષોથી આર્ટિફિશિયલ ઈન્ટેલિજન્સ એટલે કે AI પર જંગી રોકાણ કરીને સંશોધન કરી રહી છે. એમાં આ ઓછી જાણીતી કંપની અચાનક ટપકી પડી અને છવાઈ પણ ગઈ છે. ગૂગલમાં આપણે કંઈક સર્ચ કરીએ તેની માહિતી મળે પણ તેમાંથી આપણા કામની માહિતી તારવવી મુશ્કેલ છે.
જ્યારે ChatGPTતો આપણે જે પૂછીએ તેનો જવાબ લખી આપે છે, એટલે તેની ઉપયોગીતા વધી જાય છે. ChatGPT શું શું કરી શકે એ માટે વિવિધ પરીક્ષાઓ લેવાઈ રહી છે અને પરીક્ષામાં આ ચેટબોટ અવ્વલ નંબરે પાસ થઈ રહ્યો છે. એટલું જ નહીં ChatGPT દ્વારા વપરાશનો ચાર્જ પણ જાહેર કરી દેવાયો છે. કેટલીક સુવિધાઓ ફ્રી રહેશે, પરંતુ પછી વધારે ઉપયોગ કરવો હશે તો મહિને 20 ડોલર ચૂકવવાના છે.
આ 20 ડોલરનો ચાર્જ જ કદાચ ChatGPT માટે અડચણ બની શકે, કેમ કે ગૂગલ બધી સુવિધા મફત આપે છે. ગૂગલે આખા જગતને મફતની ટેવ આપી દીધી છે એટલે ChatGPT ગૂગલનો વિકલ્પ બને એવી શક્યતા ઓછી છે.
No comments:
Post a Comment